२१ मार्चको अवसर पारी बुधवार बैतडीमा ५३ औं अन्तराष्ट्रिय जातीय विभेद उन्मुलन दिवस भव्यताकासाथ मनाईएको छ । दलित महिला संघ (फेडो)को आयोजनामा जिल्लाका १० वटै स्थानीय तहका निर्वाचित दलित प्रतिनिधिहरुको सहभागितामा र्याली निकालेर जातीय विभेद उन्मुलन दिवस मनाईएको हो ।
कार्यक्रममा ग्रामीण भेगका महिलाहरुको उल्लेख्य सहभागिता रहेको थियो । जिल्लाको दुर्गम गाउँपालिका पञ्चेश्वरबाट सहभागी नारायण सार्कीले बिद्यालयमा दिवा खाजा खुवाउँने क्रममा दलित बालबालिकामाथि जातीय विभेद हुने गरेको गुनासो गर्नुभयो ।
दशरथचन्द नगरपालिका वडा नं. ९ बाट सहभागी प्रेम दयालले मन्दिरका पूजारीबाट गाउँमा दलित माथि जातीय विभेद हुने गरेको गुनासो गर्नुभयो । सहभागीहरुको गुनासो सुनेपछि प्रमुख जिल्ला अधिकारी सिद्धराज जोशीले विभेदका त्यस्ता घटनाको तुरुन्तै उजुरी दिनुहोस् हामी कानुन अनुसार कारबाही गर्छौ भन्दै जातीय विभेद उन्मुलन गर्न प्रतिबद्धता जनाउनुभयो ।
कार्यक्रममा जिल्लास्थित राजनीतिक दल, सरकारी कार्यालय, नागरिक समाज र महिलाहरुको उल्लेख्य सहभागिता रहेको थियो । कार्यक्रममा सहभागिहरुले हामी सबै जातीय विभेद उन्मुलन गर्न प्रतिबद्ध छौं भन्दै प्रतिबद्धता व्यानरमा हस्ताक्षर गरी प्रमुख जिल्ला अधिकारीले कार्यक्रमको उद्घाटन गर्नुभएको थियो ।
५३ औं अन्तराष्ट्रिय जातीय विभेद उन्मुलन दिवकामा एमाले नेता परमानन्द भट्ट, नेपाली काँग्रेसका नेता, एमालेका नेता नरेश विश्वकर्मा, तथा जिल्ला समन्वय समितिका सदस्य लालबहादुर चन्द, प्रहरी प्रमुख हेरम्ब शर्माले जातीय विभेद उन्मुलन गर्न प्रबिद्धता जनाउनुभएको थियो ।
कार्यक्रमा बोल्दै प्रमुख जिल्ला अधिकारीले जातीय विभेद जस्तो दण्डनीय कुरा कहि कतै भएको छ भने त्यसलाई कडाईपूर्वक कारबाही हुने बताउनुभयो ।
कार्यक्रमको अवसरमा जातीय विभेद उन्मुलन गर्न महत्वपूर्ण काम गर्ने व्यक्तिहरुलाई सम्मान गरिएको दलित महिला संघका जिल्ला अध्यक्ष सरस्वती नेपालीले बताउनुभयो ।
Comments
Post a Comment